BAKI, 14 aprel — Sputnik. Krasnoyarskın "Yenisey" futbol klubu Lyova Yeniseyev adlı pişiklə müqavilə imzalayıb.
Bu barədə futbol klubunun "Telegram" kanalında məlumat verilib.
Klub üzvləri pişiyi heyvan sığınacağından götürmək qərarına gəliblər. Daha sonra müqavilə imzalanıb və ev heyvanı rəsmən komandaya qəbul olunub.
Sənəddə Lyovanın yerinə yetirməli olduğu bir sıra öhdəliklər açıqlanır: pəncələrə sahib olmaq, futbol oynamağı bacarmaq, ən yaxşı pişik olmaq və oyunçuları sevindirmək. Klub özü Lyovanı dadlı yeməklərlə qidalandırmağı və ona oyuncaqlar almağı öhdəsinə götürüb.
Həmçinin, klubun mesajında "Yenisey"in yeni üzvünə iki dəst forma verildiyi vurğulanıb.
Bundan əvvəl Tver avtoservis mərkəzində əvvəllər küçədən götürülən Vasili adlı pişiyi rəsmən işə götürüb. Pişik sabit maaş və sağlamlıq sığortası ilə tüklü mexanik kimi işə qəbul edilib.