Tarixdə bu gün: 6 aprel – FOTO

BAKI, 6 aprel — Sputnik. Aprelin 6-da bir çox dünya şöhrətli aktyorlar, elm adamları, idmançılar, yazıçılar və siyasətçilər dünyaya gəliblər. Bu gün də tarixə düşən hadisələr baş verib.

Tofiq İsmayılov (1939-2016) - Azərbaycan Respublikasının xalq artisti, kinorejissoru və yazıçısıdır. O, "Hədiyyə", "Yeni üsul", "Maestro" və s. filmlərə quruluş verib.

İvan Surikov (1841-1880) - rusiyalı şair, Rusiya ədəbiyyatında "kəndli" istiqamətinin nümayəndəsi və "Uşaqlıq" şeirinin müəllifidir.

Vasili Merkuryev (1904-1978) - Sovet teatr və kino aktyoru, teatr rejissoru və SSRİ xalq artistidir. O, "İsti ürək", "Son qurban", "Gəlirli yer" və s. filmlərdə rol alıb.

Berri Levinson (1942) - amerikalı kinorejissor, ssenarist, "Oskar" mükafatı laureatıdır. O, "Yağış adamı", "Sabahın xeyir" və başqa filmləri çəkib.

Nina Puşkova (1954) - rusiyalı aktrisa və yazıçıdır. O, "Anna Karenina", "Adi bir möcüzə", "İşdə məhəbbət macərası" və s. filmlərdə rol alıb.

Kirill Andreyev (1971) - rusiyalı müğənni və "İvanuşki İnternational" qrupunun solistidir.

1652-ci ildə holland Yan Van Ribek Cənubi Afrikada Keyptaun qalasının təməlini qoyub.

1814-cü ildə Napoleon özü və varisləri üçün taxtdan imtinaya imza atıb və elə həmin gün Fransa Senatı Burbonların yenidən taxta çıxdığını elan edib.

1818-ci ildə Parisdə baron Karl Dreze ilk iki təkərli vasitəni - müasir velosipedin prototipini nümayiş etdirib.

1896-cı ildə Afinada ilk müasir Olimpiya Oyunlarının açılışı olub.

1938-ci ildə amerikalı kimyaçı Roy Plankett politetraftoretilen və ya teflonu kəşf edib.

6 aprel - Sülh və İnkişaf naminə Beynəlxalq İdman Günüdür. Bayram BMT Baş Assambleyasının 23 avqust 2013-cü il tarixli qərarı ilə təsis edilib.