Tarixdə bu gün: 23 fevral – FOTO

Şəmsi Bədəlbəyli (1911-1986) - Azərbaycan SSR xalq artisti və teatr rejissorudur. Onun səhnələşdirdiyi tamaşalar arasında "Arşın mal alan", "Durna", "Hicran" tamaşalarını qeyd etmək olar.

Anatoli Banişevski (1946-1997) - sovet futbolçusu, "Neftçi" futbol klubunun kapitanı, SSRİ beynəlxalq dərəcəli idman ustasıdır. Anatoli SSRİ milli komandasının heyətində 50 oyun keçirib və 20 qol vurub.

Həmid Araslı (1909-1983) - Azərbaycan ədəbiyyatşünası, akademiki, professoru və filologiya elmləri doktorudur. Alim müxtəlif illərdə Nəsimi, Kişvəri, Əmani, Saib Təbrizi, Qövsi Təbrizi, Məhcür Şirvani, Vaqif, Vidadi və başqa görkəmli şairlər haqqında tədqiqatların müəllifidir. O, Nizami və Füzuli irsinin öyrənilməsinə mühüm töhfələr verib.

Karl Yaspers (1883-1969) - alman filosofu, psixoloqu və psixiatrı, ekzistensializmin əsas nümayəndələrindən biridir. Psixogen xəstəliklərin diaqnostikası üçün meyarları işləyib hazırlayıb, şüur pozuntularının təsnifatını verib.

Yevgeni Krılatov (1934-2019) - Sovet və Rusiya bəstəkarı, Rusiyanın Xalq artistidir. O, 160-dan çox film və cizgi filminin musiqi müəllifidir.

Oleq Yankovski (1944-2009) - Sovet və Rusiya teatr, kino aktyoru, kinorejissoru və SSRİ xalq artistidir. O, "Qalxan və qılınc", "İki yoldaş xidmət edirdi", "Eyni Münxauzen", "Yuxuda və reallıqda uçuşlar", "Nostalji", "Adi bir möcüzə" filmlərindəki rolları ilə tanınıb.

1874-cü ildə Böyük Britaniyada mayor Uolter Vinqfild açıq havada oynanılan tennis oyunu üçün patent alıb.

1893-cü ildə alman mühəndisi Rudolf Dizel dizel mühərriki üçün patent alıb.

1941-ci ildə ABŞ-da Qlenn Siborqun rəhbərliyi ilə Kaliforniya Universitetinin bir qrup alimi ilk dəfə olaraq plutonium radioaktiv elementini əldə edib.

2010-cu ildə BMT Baş Assambleyasının qətnaməsinə əsasən, martın 21-i Beynəlxalq Novruz Günü elan edilib.