BAKI, 28 dekabr — Sputnik. MAQATE-nin baş direktoru Rafael Qrossinin 2024-cü ildə yenidən Rusiyaya səfəri gözlənilir. Konkret tarix tərəflərin hazırlığından asılı olacaq.
Bunu Rusiya Federasiyasının Vyanadakı beynəlxalq təşkilatlar yanında daimi nümayəndəsi Mixail Ulyanov "RİA Novosti"yə müsahibəsində bildirib.
Onun sözlərinə görə, tərəflər "kifayət qədər sıx dialoqu" davam etdirirlər. Ulyanov xatırladıb ki, 2022 və 2023-cü illərdə Qrossi ilk növbədə Zaporojye AES-ə dair Rusiya idarələrarası nümayəndə heyəti ilə məsləhətləşmələrdə iştirak etməkdən ötrü Rusiya Federasiyasına bir neçə dəfə səfər edib.
"Əlbəttə, bu dialoq davam edəcək. Düşünürəm ki, o, böyük ehtimalla 2024-cü ildə Rusiyaya səfər edəcək. Tarix hər iki tərəfin hazırlığından asılıdır. Hələlik bununla bağlı tam aydınlıq yoxdur", - deyə Ulyanov bildirib.
Qeyd üdək ki, Zaporojye Atom Elektrik Stansiyası Dnepr çayının sol sahilində, Enerqodar şəhərinin yaxınlığında yerləşir. Bu, aqreqatların sayına və quraşdırılmış gücünə görə Avropanın ən böyük atom elektrik stansiyasıdır - stansiyada 1 giqavatt gücündə altı enerji bloku var. 2022-ci ilin oktyabrında AES Rusiya Federasiyasının mülkiyyətinə keçib.
Rusiyanın müdafiə naziri Sergey Şoyqu bildirib ki, Kiyev rejimi Zaporojye atom elektrik stansiyasını qəsdən atəşə tutmağa davam etməklə nüvə fəlakəti təhlükəsi görüntüsü yaratmağa çalışır. Beynəlxalq Atom Enerjisi Agentliyi Zaporojye AES-in ətrafında təhlükəsizlik zonasının yaradılmasının zəruriliyini dəfələrlə bəyan edib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.