Qlobal "qara qızıl" bazarında etalon neft brendlərinin qiymətləri bahalaşıb

BAKI, 20 noyabr — Sputnik. Etalon neft növlərinin dünya qiymətləri keçən cümə günü sıçrayışdan sonra 20 noyabr bazar ertəsi səhər bahalaşır. Londonun ICE Futures birjasında Brent markalı neftin yanvar fyuçerslərinin qiyməti 0,55 dollar artaraq 1 barelə görə 81,16 dollar, Nyu-Yorkun NYMEX əmtəə birjasında keçirilən elektron ticarət əməliyyatlarının gedişində WTI neftinin yanvar fyuçerslərinin qiyməti 0,53 dollar artaraq 1 barelə görə 76,57 dollar təşkil edib.

Qeyd edək ki, etalon neft brendlərinin dünya qiymətləri ötən həftə müsbət notda açılıb. "Qara Qızıl" da həftəni "plyus"la başa vurub. Belə ki, bazar ertəsi, noyabrın 13-də dünya bazarında neftin qiyməti OPEK-in neft bazarı ilə bağlı hesabatının açıqlanması ərəfəsində bahalaşıb.

Brent markalı neftin yanvar fyuçerslərinin qiyməti 0,23% artaraq 81,62 dollar/barelə, WTI markalı neftin dekabr fyuçersləri isə 0,25% artaraq 77,36 dollar/barelə çatıb.

Daha sonra çərşənbə axşamı bazarlar xammala olan qlobal tələbi qiymətləndirdiyi üçün neftin qiyməti 1,5% artıb. Noyabrın 14-ü axşam saatlarında Brent markalı neftin yanvar fyuçerslərinin qiyməti 1,44% artaraq 83,71 dollar/barelə, WTI markalı neftin dekabr fyuçersləri isə 1,51% artaraq 79,44 dollara çatıb.

Lakin çərşənbə günü, noyabrın 15-də, ABŞ Energetika Nazirliyinin ölkədə iki həftə ərzində ehtiyatlara dair məlumatlarının açıqlanmasından sonra etalon neftin qiyməti ucuzlaşıb. Brent markalı neftin yanvar fyuçerslərinin qiyməti 0,74% ucuzlaşaraq 81,85 dollar/barelə, WTI markalı neftin dekabr fyuçerslərinin qiyməti isə 1,04% azalaraq 77,44 dollar/barelə bərabər olub.

Cümə axşamı dünya neft qiymətləri enişi 5%-dən çox sürətləndirildi və Brent markalı neftin bir barelinin dəyəri iyulun 7-dən bəri ilk dəfə olaraq 77 dollardan aşağı düşdü. Belə ki, Brent markalı neftin yanvar fyuçerslərinin dəyəri 5,46% ucuzlaşaraq 76,75 dollar/barelə, WTI markalı neftin dekabr fyuçersləri 5,58% ucuzlaşaraq 72,38 dollar/barelə enib.

Ticarətin son günü, cümə günü, noyabrın 17-də dünya bazarında neftin qiyməti bir gün əvvəl gözlənilməz 5%-lik enişdən sonra korreksiya edərək 4% artıb. Brent markalı neft 4,24% artaraq 80,71 dollar/barelə, WTI markalı neftin dekabr fyuçersi isə 3,98% artaraq 75,8 dollar/barelə çatıb.