BAKI, 16 noyabr — Sputnik. ABŞ-də yaşayan azərbaycanlı rejissor Elmar Bayramov müəllifi olduğu "Nəfəs" ("Breath") qısametrajlı filminə görə 14-cü Bakı Beynəlxalq Qısa Film Festivalının (yerli müsabiqə) ən yaxşı rejissoru nominasiyasının qalibi olub.
Bu barədə Diasporla İş üzrə Dövlət Komitəsindən məlumat verilib.
Bildirilib ki, rejissor bu günlərdə "Nəfəs" filminin Haaqa Beynəlxalq Film Festivalının əsas proqramına daxil edilməsi barədə xəbər alıb. Haaqa Beynəlxalq Film Festivalının direktoru Dr. Avniş Rajvanşinin adından Elmar Bayramova ünvanlanan məktubda bildirilib ki, azərbaycanlı rejissorun ekran əsəri 80 ölkədən 600 film arasından seçilib.
Qeyd edək ki, bu ilin əvvəlində Diasporla İş üzrə Dövlət Komitəашдьsinin və Heydər Əliyev Fondunun dəstəyi ilə "Nəfəs" filminin ABŞ-nin Nyu-York və Boston şəhərlərində təqdimatı keçirilib.
"Nəfəs" qısametrajlı filmi Birinci Qarabağ müharibəsində əsir düşənlərə həsr olunub. Filmdə müharibənin ağır təsirləri, insanların həyatında qoyduğu ağır psixoloji fəsadların post-müharibə dövründə də davam etdiyi, müharibə sonrası şəxsiyyətin cəmiyyətə reinteqrasiyasının çətinlikləri diqqətə çatdırılıb. Çəkilişləri Azərbaycanda aparılan film "Old stone pictures" və "Black Garden Company" şirkətlərinin Azərbaycan Diasporuna Dəstək Fondu ilə əməkdaşlığı çərçivəsində istehsal olunub.