BAKI, 23 oktyabr — Sputnik. Azərbaycanın xarici işlər naziri Ceyhun Bayramov Qərb ölkələrinin regional problemlərlə bağlı mövqeyini tənqid edib.
“Report” xəbər verir ki, bu barədə C.Bayramov İran Prezidenti İbrahim Rəisinin qəbulunda olarkən danışıb.
O, Azərbaycanın İranla əlaqələrə xüsusi önəm verdiyini bildirib: "İranın Azərbaycanın ərazi bütövlüyünün dəstəklənməsi məsələsində tutduğu mövqeyi yüksək qiymətləndiririk".
XİN başçısı vurğulayıb ki, son aylar iki ölkə arasında münasibətlərin normallaşması və ikitərəfli əməkdaşlığın təşviqi istiqamətində mühüm irəliləyişlər əldə olunub.
***
Azərbaycanın xarici işlər naziri Ceyhun Bayramov "3+3" formatında birinci nazirlər görüşündə iştirak etmək məqsədilə İrana işgüzar səfərə yola düşüb.
Bu barədə Xarici İşlər Nazirliyindən məlumat verilib.
Səfər çərçivəsində nazir C.Bayramovun tədbirdə çıxışı, eləcə də ikitərəfli görüşlərinin keçirilməsi nəzərdə tutulub.
Bu gün İranın paytaxtı Tehranda "3+3" regional formatı (Azərbaycan, Ermənistan, Gürcüstan, İran, Rusiya, Türkiyə) çərçivəsində görüş keçiriləcək.
Xarici işlər nazirlərinin iştirakı ilə keçiriləcək görüşdə siyasi, iqtisadi, təhlükəsizlik, nəqliyyat, enerji sahələrində regional əməkdaşlıq məsələləri müzakirə ediləcək.
Qeyd edək ki, Gürcüstan Xarici İşlər Nazirliyi rəsmi Tbilisinin Tehranda "3+3" regional formatında keçiriləcək görüşdə iştirak etməyəcəyini təsdiqləyib. Gürcüstan "3+3" formatının ötən il Moskvada baş tutan ilk görüşündə də iştirak etməyib.