BAKI, 20 oktyabr — Sputnik. Xəzərin Azərbaycan sektorunda yerləşən "Abşeron" qaz-kondensat yatağı istismara veriləndən indiyədək 453 mln. kubmetr qaz hasil edilib.
Bu barədə energetika naziri Pərviz Şahbazovun "Energetiklər Günü" münasibətilə rəsmi mətbuatda dərc olunan məqaləsində bildirilib.
Məqalədə qeyd olunub ki, yataqdan indəyədək 171 min ton qaz kondensatı çıxarılıb.
Qeyd edək ki, Xəzər dənizinin Azərbaycan sektorunda, Bakıdan təxminən 100 kilometr cənub-şərqdə yerləşən "Abşeron" qaz-kondensat yatağı JOCAP (Joint Operating Company of Absheron Petroleum B. V.) tərəfindən idarə olunur. Yataqdan ilk qaz cari ilin iyul ayının əvvəlində hasil edilib.
Onu da əlavə etmək lazımdır ki, yataqda illik hasilatın 1,5 mlrd. kubmetrdən 6 mlrd. kubmetrədək artırmaq planlaşdırılır.
Xatırladaq ki, bu ilin avqustunda SOCAR, "TotalEnergies" və ADNOC şirkətləri arasında "Abşeron" qaz-kondensat yatağında 30%-lik iştirak payının satışına dair Saziş imzalanıb. Satınalma tamamlandıqdan sonra ADNOC şirkəti Abşeron qaz-kondensat yatağında 30% iştirak payı əldə edəcək, SOCAR və "TotalEnergies" şirkətlərinin hər birinin iştirak payları isə, müvafiq olaraq 35% təşkil edəcək.