BAKI, 4 oktyabr — Sputnik. Türkiyənin Ana Vətən Partiyasının lideri Doğu Perinçək deyib ki, Türkiyədə qadağan olunmuş Kürdüstan Fəhlə Partiyası (PKK) ABŞ-ın icazəsi olmadan Ankaranın mərkəzində terror aktına cəhd edə bilməzdi.
Oktyabrın 1-i səhər saatlarında Ankaranın mərkəzində Daxili İşlər Nazirliyinin binası yaxınlığında bir terrorçunun özünü partlatdığı, digərinin isə zərərsizləşdirildiyi terror aktına cəhddən sonra Türkiyə təhlükəsizlik qüvvələri bütün ölkə ərazisində "Qəhrəmanlar" antiterror əməliyyatı keçirir. Atışma zamanı iki polis əməkdaşı yüngül yaralanıb. "A Haber" telekanalının verdiyi məlumata görə, terror aktına cəhdə görə məsuliyyəti Türkiyədə qadağan edilmiş PKK öz üzərinə götürüb. Bu hadisələrdən sonra Türkiyə Milli Müdafiə Nazirliyi İraqın şimalında PKK yaraqlılarının hədəflərinə hava zərbələri endirdiyini və 20 hədəfin məhv edildiyini açıqlayıb.
"Türk polisini sayıqlığı, vəzifə hissi və qəhrəmanlığına görə təbrik edirik. Bu hücum terrorçular üçün tam məyusluq və bədbəxtlik idi. Məqsəd nə idi və kimlər həyata keçirdi? ABŞ-ın təzyiqi olmadan PKK belə bir hərəkətə keçə bilməz. Burada məcburiyyət var. Mən inanıram ki, bu məcburiyyət ABŞ-dan gəlir", – deyə siyasətçi bildirib.
O əlavə edib ki, ABŞ Suriyanın şimalında bəzi hadisələrlə bağlı yenidən terroru təhrik edəcəyini açıq şəkildə bildirir.
Ana Vətən Partiyası Türkiyənin ilk prezidenti Mustafa Kamal Atatürkün mövqelərini izləyən, anti-Qərb və anti-Amerika yönümlü solçu hərəkatdır. Partiya özünü 1919-cu ildə yaradılmış Fəhlə və Kəndli Sosialist Partiyasının varisi hesab edir. Türkiyə parlamentində təmsil olunmasa da, ölkədə, xüsusən də bölgələrdə nüfuzlu qüvvədir.