BAKI, 11 sentyabr — Sputnik. Azərbaycan Qırğızıstanın İssık-Kul gölünün sahilində beşulduzlu hotel tikmək niyyətindədir.
Bunu Qırğızıstan Respublikasının Joqorku Keneşin (parlament) deputatı Dastan Bekeşev öz "Telegram" kanalında məlumat verib.
"Büdcə Komitəsinin iclası zamanı İssık-Kul gölünün sahilində beşulduzlu hotelin tikintisi ilə bağlı Azərbaycanla saziş nəzərdən keçirəcəyik. Bu məqsədlə Nazirlər Kabineti tərəfindən Kara-Oy kəndində 17 hektar torpaq sahəsi ayrılıb ki, bunun da 12 hektarı tikilib abadlaşdırılacaq, 4 hektarı park və 1 hektarı isə vətəndaşların istifadəsinə veriləcək çimərlik sahəsi olacaq", - deyə Sputnik Qırğızıstan deputatdan sitat gətirir.
Bekeşev qeyd edib ki, Qırğızıstan pansionat üçün infrastruktur yaratmağı və ona yol çəkməyi, obyekti 10 il müddətinə vergidən azad etməyi, həmçinin istifadəni uzatmaq hüququ ilə 49 il müddətinə torpaqla təmin etməyi öhdəsinə götürür.
Öz növbəsində Azərbaycan tərəfi 3 il ərzində hotel inşa edəcək və Qırğızıstandan olan işçilərin 70%-ni işlə təmin edəcək.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.