Şovidə faciə: fəlakət bölgəsində axtarış əməliyyatı davam edir

BAKI, 7 avqust — Sputnik. Gürcüstanda baş vermiş torpaq sürüşməsindən sonra xilasedicilər Şovi yüksək dağ kurortundakı fəlakət zonasında işlərini davam etdirirlər, hazırkı mərhələdə əsas vəzifə itkin düşən 18 vətəndaşı tapmaqdır. Bu barədə Gürcüstan Fövqəladə Halların İdarə Olunması Xidməti xəbər verir.

Son məlumatlara görə, avqustun 3-də Şovidə baş verən sürüşmə nəticəsində 18 nəfər ölüb. Körpülər dağıdılıb, Şovinin girişindəki yol zədələnib. Bu vaxta qədər xilasedicilər 210 nəfəri təxliyə ediblər. Onlar itkin düşən 18 vətəndaşı, o cümlədən yeddi uşağı axtarırlar.

Gecə boyu təbii fəlakət zonasında xüsusi işıqlandırma vasitəsi ilə fasiləsiz olaraq axtarış tədbirləri həyata keçirilib.

Xilasedicilər artıq beşinci gündür ki, axtarış işləri aparırlar. Səhər saatlarında Gürcüstan Daxili İşlər Nazirliyinin sərhəd polisinin iki helikopteri yenidən işə başlayıb. Axtarış işlərində polis bölmələri, Fövqəladə Hallar Nazirliyinin bir qrup kinoloqu, Müdafiə və İnfrastruktur nazirliklərinin, Avtomobil Yolları İdarəsinin əməkdaşları iştirak edir. Ərazidə pilotsuz uçuş aparatları və xüsusi avadanlıqlar fəaliyyət göstərir.

Gürcüstanda avqustun 7-si ölənlər üçün matəm elan edilib. Raça kurort bölgəsində təbii fəlakət qurbanlarının xatirəsinə matəm günü ilə əlaqədar bütün Gürcüstanda dövlət bayraqları yarıya endirilib.

Mütəxəssislərin ilkin qənaətinə görə, faciəyə bir neçə təbiət hadisəsinin üst-üstə düşməsi səbəb olub. Qeyd edilib ki, 2023-cü il avqustun 3-də bir sıra təbii geoloji və hidrometeoroloji hadisələr - buzlaqın intensiv əriməsi, yağıntılar, yuxarı axarlarda qayaların çökməsi, sürüşmə-eroziya prosesləri və selin keçməsi üst-üstə düşüb.

Şovidə xilasetmə əməliyyatında 400 xilasedici və 200 əsgər, o cümlədən 178 ədəd xüsusi texnika iştirak edir. Mütəxəssislər Şovi kurortuna 5 milyon kubmetrə yaxın bərk kütlənin gəldiyini bildirirlər.

Ekspertlər bildirirlər ki, indiki mərhələdə Şovidə belə təbii fəlakətin təkrarlanma təhlükəsi yoxdur. Şovi iqlim və balneoloji kurortu Onski rayonunda (Raça-Leçxumi və Kvemo Svaneti bölgəsi) dəniz səviyyəsindən 1,5 min metr yüksəklikdə yerləşir.