BAKI, 3 avqust — Sputnik. Türkiyədə aylıq inflyasiya 2022-ci ilin yanvarından bəri ən yüksək səviyyəyə çatıb.
Türkiyə Statistika Təşkilatının açıqladığı məlumatlara görə, iyul ayında aylıq inflyasiya maaş və vergi tənzimləmələri, yanacaq qiymətlərindəki artım səbəbiylə 2022-ci ilin yanvarından bu yana ən yüksək səviyyəyə yüksəlib.
İllik inflyasiyada son aylarda müşahidə edilən azalma iyul ayında başa çatıb. Belə ki, iyul ayında Türkiydə aylıq inflyasiya 9,49%, illik inflyasiya isə 47,83% təşkil edib.
Ötən ay ən yüksək aylıq artım 17,75% ilə nəqliyyat sahəsində qeydə alınıb. Sonrakı yerlərdə isə 13,61% artım ilə səhiyyə, 11,92% artım ilə restoran və otellər gəlir.
İnflyasiyanın yeni yüksəliş tendensiyası gözləntiləri Türkiyə Respublikası Mərkəzi Bankının (TCMB) proqnozlarında da öz əksini tapıb və TCMB ilin sonuna inflyasiya gözləntisini 22,3%-dən 58%-ə qaldırıb.
Xatırladaq ki, bu ilin iyulun 16-na keçən gecə Türkiyədə benzin və dizel yanacağının qiymətləri 20% artıb.