BAKI, 30 iyul - Sputnik. "Biz Bajaurda siyasi konqresdə törədilən terror aktını şiddətlə qınayırıq".
Bu barədə Azərbaycan Xarici İşlər Nazirliyinin Twitter hesabında yayılan bəyanatında qeyd olunub.
“Biz 40 nəfərin ölümü, yüzdən çox insanın yaralanması ilə nəticələnən bu terror aktına qarşı qardaş Pakistanın yanındayıq. Hökumətə, həlak olanlara və onların ailələrinə başsağlığı veririk” – bəyanatda deyilir.
***
Pakistanın şimal-qərbindəki Xayber-Paxtunxva əyalətində İslam Alimləri Assambleyası partiyasının konqresində kamikadzenin törətdiyi partlayış nəticəsində azı 40 nəfər ölüb.
Fövqəladə hallar xidmətləri və yerli hakimiyyət orqanlarının verdiyi məlumata görə, 200-dən çox insan da müxtəlif dərəcəli xəsarət alıb, xəstəxanaya yerləşdirilib.
Partlayış yerli vaxtla saat 16:00 radələrində baş verib. Hadisə partiya liderlərindən birinin təxminən 400 nəfərin olduğu bir qrup tərəfdarı qarşısında çıxış edərkən olub.
Pakistanın baş naziri Şahbaz Şərif hadisənin araşdırılması və məsuliyyət daşıyanların tapılması barədə göstəriş verib.