BAKI, 18 iyul — Sputnik. Bakı metropolitenində əlil arabası ilə daşımalar, yaxud da az mobilli sərnişinlərin istifadəsini təmin etmək məqsədilə "Əlçatan metro" layihəsi həyata keçirilir.
Bunu Sputnik Azərbaycan-a açıqlamasında "Bakı metropoliteni" Qapalı Səhmdar Cəmiyyətinin mətbuat katibi Bəxtiyar Məmmədov deyib. O qeyd edib ki, 2019-cu ildə "Əlçatan metro" layihəsinə 740 müraciət daxil olub. Müraciət edənlərin 131-i sonra həmin xidmətdən istifadə etməkdən imtina edib. İmtinaya səbəb müraciət edən şəxslərin planlarını dəyişmələri ilə bağlı olub və onların metrodan istifadəsinə zərurət olmayıb.
Bəxtiyar Məmmədovun sözlərinə görə, bu xidmətdən yararlanmaq istəyən sərnişinlər 1-12 saat ərzində quruma müraciət edə bilərlər. Zərurət olmadığı təqdirdə, 20 dəqiqə ərzində müraciətdən imtina etmək mümkündür.
Məmmədov bildirib ki, əlilliyi olan sərnişinlərin rahatlığını təmin etmək üçün əvvəllər də müxtəlif qurğular alınıb. Lakin bənövşəyi xətt istisna olmaqla, yaşıl və qırmızı xətləri liftlərlə təchiz etmək hələlik qeyri-mümkündür.
"Metropoliten daha bir qurğunu sınaqdan keçirmək niyyətindədir. Artıq bununla bağlı sifariş verilib. Bu eskalatorlarda əlil arabasının daşınması üçün istifadə olunan qurğulardır. Əgər qurğu sınaqdan uğurla keçərsə, bütün stansiyalarda ondan istifadə olunacaq. Uşaq arabası ilə hərəkət edən sərnişinlər də bu yenilikdən yararlana biləcəklər", - deyə o, əlavə edib.
Qeyd edək ki, sözügedən xidmətdən istifadə etmək istəyənlər bu nömrə ilə əlaqə saxlaya bilərlər: +994 50 268 00 65
Digər maraqlı xəbərləri həmçinin Sputnik Azərbaycan-ın Teleqram kanalından izləyin.