BAKI, 11 iyul — Sputnik. Beynəlxalq Futbol Tarixi və Statistikaları Federasiyası (IFFHS) klubların yeni dünya reytinqini açıqlayıb.
IFFHS-nin rəsmi saytının yaydığı xəbərə görə, 300 komandanın olduğu siyahıda Azərbaycan təmsilçilərindən "Qarabağ" və "Neftçi" yer alıb.
"Köhlən atlar" ötən ayla müqayisədə 3 pillə geriləyib. Ölkə çempionu 138,5 xalla 74-cüdür.
67 xala malik "Neftçi" 4 sıra itirərək 291-ci olub.
Reytinqdə lider dəyişməyib. İspaniyanın "Real Madrid" klubu 315 xalla birincidir. UEFA Çempionlar Liqasının qalibi olan İngiltərənin "Mançester Siti" komandası 311 xalla ikincidir. İlk "3-lüy"ü 296 xalla Braziliya təmsilçisi "Flamenqo" qapayır.
Məlumat üçün bildirək ki, Beynəlxalq Futbol Tarixi və Statistikaları Federasiyası (ing. International Federation of Football History & Statistics) 1888-ci ildən başlayaraq, bütün ölkələrdə və bütün illərdə keçirilən milli çempionatların tarixini araşdırır.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.