BAKI, 5 iyul — Sputnik. Stokholmda Quranın təhqir edilməsi və yandırılması ilə keçirilən aksiya İsveçə NATO-ya üzv olması üçün strateji problem yaradıb.
Bu barədə Türkiyənin "Hürriyet" qəzeti diplomatik mənbələrə istinadən məlumat yayıb.
Qurban bayramının qeyd olunduğu bir vaxtda Stokholmdakı ən böyük məscidin qarşısında Quranın yandırılması aksiyası İslam dininə etiqad edən əhalinin böyük hissəsi olan ölkələrdə mənfi reaksiyaya səbəb olub.
"Son hadisələr istər-istəməz İsveçin yarada biləcəyi strateji və təhlükəsizlik problemini ön plana çıxardıb. Stokholmun hərəkətlərinə yalnız Türkiyə deyil, bütün İslam dünyası da qarşı çıxır", - məqalədə qeyd edilib.
Eyni zamanda, mənbənin sözlərinə görə, NATO yenə də İsveçin Alyansa qoşulması üçün ona qapıları açmağa hazırlaşır.
Xatırladaq ki, Avropa İttifaqı (Aİ) İsveçi Müqəddəs Kitabı yandırdığına görə qınasa da, bəyanatını din və inanc azadlığını müdafiə etməyə davam etmək istəyi ilə yekunlaşdırıb.
Türkiyə Prezidenti Rəcəb Tayyib Ərdoğan da öz növbəsində isveçlilərin hərəkətini "İslam düşmənlərinin alçaqlığı" adlandırıb və islamofobiya məsələsi bağlanana qədər İsveçin NATO-ya üzv olmasına icazə verməyəcəyini açıq şəkildə bildirib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.