BAKI, 20 iyun — Sputnik. Moskva Pekin və Vaşinqton arasında proqnozlaşdırılan münasibətlərin qurulmasının əhəmiyyətini heç də kiçiltmir. Bu barədə jurnalistlərə Rusiya Federasiyası prezidentinin mətbuat katibi Dmitri Peskov ABŞ dövlət katibi Entoni Blinkenin Çinə səfərini şərh edərkən məlumat verib.
"Əlbəttə ki, Çin digər ölkələrlə münasibətlər qurmaq üçün öz suveren hüquqlarından istifadə edir. Çin və ABŞ arasında proqnozlaşdırılan münasibətlərin əhəmiyyətini gözdən salmağa dəyməz. Çinin başqa ölkələrlə bu cür münasibətlərinin qurulması heç vaxt ölkəmizə qarşı yönəlməyəcək", - Kremlin sözçüsü deyib.
İyunun 18-19-da Blinken Pekində səfərdə olub və Çin rəhbərliyinin nümayəndələri ilə görüşüb. O, yaxın vaxtlarda ABŞ administrasiyasının bir sıra digər nümayəndələrinin də Çinə səfər edəcəyini bəyan edib.
Dövlət katibi həmçinin bildirib ki, Çinin xarici işlər naziri Sin Qanı Vaşinqtona dəvət edib. Bu, ABŞ Dövlət Departamenti rəhbərinin 2018-ci ilin oktyabrından bəri Çinə ilk səfəridir.
Blinken Pekində Çin Xalq Respublikasının sədri Si Cinpin və ÇKP Mərkəzi Komitəsinin Xarici Əlaqələr Komissiyasının ofisinin rəhbəri, Siyasi Büro üzvü Van İ ilə də görüşüb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.