BAKI, 16 iyun — Sputnik. Azərbaycan iyul ayından başlayaraq Pakistana güzəştli qiymətlərlə mayeləşdirilmiş təbii qaz (MTQ) tədarük etməyə başlayacaq. “TASS” xəbər verib ki, cümə günü Pakistanın baş naziri Şahbaz Şərifin ofisinin yaydığı bəyanatda belə deyilir.
"Azərbaycandan MTQ idxalına başlanması bu ay Rusiyadan neftin ilk partiyasını aldıqdan sonra Pakistanın enerji ehtiyaclarını ödəməkdə əldə etdiyi ikinci böyük nailiyyət olub", - deyə ofisdən bildirilib.
MTQ-nin tədarükü Pakistan Dövlət Neft Şirkəti (PSO) ilə Azərbaycan Respublikası Dövlət Neft Şirkəti (SOCAR) arasında bağlanmış müqavilə əsasında həyata keçiriləcək. Sənəd Pakistan hökuməti başçısının iyunun 15-də başa çatan Bakıya iki günlük rəsmi səfəri zamanı açıqlanıb.
Şərif və Azərbaycan Prezidenti İlham Əliyev enerji, ticarət, investisiya, mülki aviasiya və digər sahələrdə əməkdaşlıq haqqında razılığa gəliblər.
İki ölkə liderləri birgə mətbuat konfransında “Azərbaycan Hava Yolları”nın İslamabada birbaşa uçuşlarına başladığını və birgə hərbi təlimlərin sayının artırılması barədə qərar qəbul etdiklərini açıqlayıblar.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.