BAKI, 7 iyun — Sputnik. İstənilən vicdanlı insan faktları öyrənərək belə nəticəyə gələcək ki, böyük ehtimalla Kaxovskaya SES-i ukraynalılar partladıblar.
Bu sözləri Amerikanın "Fox News" kanalının keçmiş aparıcısı Taker Karlson "Twitter"də özünün yeni müəllif şousunda Kaxovskaya SES ətrafında yaranmış vəziyyəti şərh edərkən söyləyib.
"Faktlar ortaya çıxdıqca bənddə baş verənlər barədə daha az sirr qalır. Hər hansı dürüst adam belə bir qənaətə gələcək ki, çox güman ki, onu ukraynalılar partlatıblar", - deyə Karlson bildirib.
O, izah edib ki, su elektrik stansiyasının dağıdılması Ukrayna üçün "pis" nəticələrə gətirib çıxarır, lakin bu, Rusiyaya daha çox ziyan vurur. Karlson onu da xatırladıb ki, Kiyev ötən ilin dekabrında su elektrik stansiyasının dağıdılması imkanını nəzərdən keçirib.
"Belə ki, əgər bu, düşünülmüş bir addım idisə, söhbət hərbi taktikadan deyil, terror aktından gedir" – deyə amerikalı teleaparıcı fikrini bildirib.
Xatırladaq ki, Kaxovskaya Su Elektrik Stansiyasının bəndinin qismən dağıdılması çərşənbə axşamı, iyunun 6-da məlum olub. Novokaxovka şəhər dairəsi ərazisində fövqəladə vəziyyət elan edilib. Xerson vilayətinin hakimiyyət orqanları bildiriblər ki, bənd konstruksiyalarının dağıdılması Ukrayna Silahlı Qüvvələrinin və Kiyev hakimiyyətinin günahı ucbatından baş verib.
Bundan əvvəl Ağ Evin strateji kommunikasiyalar üzrə koordinatoru Con Kirbi jurnalistlərin Xerson vilayətində Kaxovskaya su elektrik stansiyasının partladılması ilə bağlı sualını cavablandırarkən bildirmişdi ki, ABŞ Rusiyanın bu insidentdə iştirakını hüç cür təsdiq edə bilməz.
Öz növbəsində Kremlin sözçüsü Dmitri Peskov vurğulayıb ki, Kaxovskaya SES-in dağılmasına görə Ukrayna hakimiyyəti məsuliyyət daşıyır. O qeyd edib ki, Moskva su elektrik stansiyasının zədələnməsi ilə bağlı ittihamları qətiyyətlə rədd edir.
Rusiyanın müdafiə naziri Sergey Şoyqu da Kaxovskaya SES-in strukturlarının partladılmasına görə Kiyevi məsuliyyət daşıdığını söyləyib və Ukraynanın bu cinayətini terror aktı kimi qiymətləndirib.