BAKI, 1 iyun — Sputnik. "Azərbaycan və Ermənistan liderlərinin bu gün baş tutacaq görüşü çox vacibdir".
"Report" xəbər verir ki, bunu Avropa İttifaqı Şurasının Prezidenti Şarl Mişel Moldovanın paytaxtı Kişineuda "Avropa siyasi birliyi" 2-ci zirvə toplantısının açılış mərasimindən əvvəl jurnalistlərə açıqlamasında deyib.
"Bugünkü görüş çox mühümdür. Mənim bir neçə həftə əvvəl Brüsseldə Azərbaycan və Ermənistan liderləri ilə görüşmək imkanım olub", - deyə o bildirib.
Ş.Mişel danışıqlarda müəyyən irəliləyişlərin olduğunu söyləyib.
Avropa İttifaqı Şurasının Prezidenti ümid edir ki, Azərbaycan və Ermənistan liderləri arasında bugünkü görüş iki ölkə arasında münasibətlərin normallaşdırılması üçün ümumi siyasi iradənin təsdiqlənməsi üçün fürsət olacaq.
Qeyd edək ki, “Avropa siyasi birliyi”nin Moldovada keçirilən Zirvə Toplantısı çərçivəsində Azərbaycan Prezidenti İlham Əliyev, Avropa İttifaqı Şurasının Prezidenti Şarl Mişel, Ermənistanın baş nazirinin, Almaniya və Fransa liderlərinin iştirakı ilə beştərəfli görüş keçiriləcək.