BAKI, 10 may — Sputnik. "Qarabağ və Şərqi Zəngəzurda "ASAN" xidmət mərkəzləri fəaliyyət göstərəcək".
Bunu Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin ("ASAN xidmət") sədri Ülvi Mehdiyev jurnalistlərə açıqlamasında deyib.
O bildirib ki, Qarabağda hazırda yeni kəndlər, şəhərlər, qəsəbələr salınır: "Qarabağda ermənilərin törətdikləri vandalizm göz önündədir. Orada Prezident İlham Əliyevin rəhbərliyi ilə ciddi infrastruktur layihələri həyata keçirilir. İnfrastruktur problemi həll edildikdən sonra Qarabağ və Şərqi Zəngəzurda "ASAN" xidmət mərkəzləri fəaliyyət göstərəcək".
Xatırladaq ki, “ASAN xidmət” mərkəzləri Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində Azərbaycan Prezidentinin 2012-ci il 13 iyul tarixli Fərmanına əsasən yaradılıb.
“ASAN xidmət” mərkəzləri dövlət orqanları tərəfindən göstərilən xidmətlərin vahid və əlaqələndirilmiş formada həyata keçirilməsini təmin edən qurumlardır.