BAKI, 4 may — Sputnik. İranın Ermənistandakı səfirliyi bu ölkədə həbsdə olan iranlıların səfirliklə bağlı şikayətlərinə münasibət bildirib.
Səfirlikdən bildirilib ki, hazırda Ermənistanda İran İslam Respublikasının 60-a yaxın vətəndaşı müxtəlif ittihamlarla, xüsusən də narkotik vasitələrin daşınması və keçirilməsinə görə həbsdədir. Ermənistanda heç bir İran vətəndaşı ağrıkəsici dərman keçirmək ittihamı ilə həbs edilməyib.
“Səfirlik öz vəzifələri çərçivəsində məhbusların sayını azaltmaq, İran vətəndaşlarının hüquqlarını dəstəkləmək və Ermənistanda həbsdə olan və saxlanılan həmvətənlərinə xidmət göstərmək üçün müxtəlif tədbirlər həyata keçirir. Təqsirləndirilən şəxslərə qarşı irəli sürülən ittihamlara Ermənistan Respublikasının cinayət qanunları və prosessual qaydaları çərçivəsində baxılır”, - deyə səfirliyin açıqlamasında qeyd olunub.
Bundan başqa, bildirilib ki, İranın Ermənistandakı səfiri və digər diplomatik nümayəndələr bu ölkədə həbsdə olan vətəndaşlarını müntəzəm olaraq ziyarət edir.
Qeyd edək ki, sosial mediada Ermənistandakı iranlı məhbusların İranın İrəvandakı səfirliyinin diqqətsizliyindən narazılıq etməsi ilə bağlı videogörüntülər yayılıb. (APA)