BAKI, 4 yanvar - Sputnik. Türkiyənin dövlət başçısı Rəcəb Tayyib Ərdoğanın Rusiya Prezidenti Vladimir Putin və Ukrayna lideri Vladimir Zelenski ilə bu günə (4 yanvar - red) planlaşdırılan telefon danışıqlarından sonra BMT Türkiyə rəhbərliyi ilə əlaqə saxlayacaq.
Bunu BMT Baş katibinin nümayəndəsi Stefan Düjarrik brifinqdə bildirib.
Onun sözlərinə görə, Ukraynadakı münaqişə zamanı Türkiyə hakimiyyəti bu cür telefon danışıqları ilə bağlı məlumatı mütəmadi paylaşıb.
“Əminəm ki, onlar başa çatdıqdan sonra Türkiyə rəsmiləri ilə əlaqə saxlayacağıq”, - Düjarrik bildirib.
Türkiyə prezidenti Rəcəb Tayyib Ərdoğan Rusiya prezidenti Vladimir Putin və Ukrayna prezidenti Vladimir Zelenski ilə bu günə planlaşdırılan telefon danışıqları zamanı danışıqlar prosesində bir daha Ankaranın vasitəçiliyini təklif etmək niyyətindədir.
Bu barədə diplomatik mənbə RİA Novosti-yə bildirib.
Rusiya və Türkiyə prezidentləri arasında telefon danışığı yanvarın 4-nə planlaşdırılıb. Bunu Rusiya liderinin mətbuat katibi Dmitri Peskov RİA Novosti-yə təsdiqləyib. Daha əvvəl Türkiyə prezidentinin nümayəndəsi bildirib ki, Ərdoğan çərşənbə günü Putin və Zelenski ilə telefon danışıqlarına ümid edir.
"Cari ildə prezident Ərdoğan atəşkəsə nail olmaq üçün danışıqlar prosesinin bərpası istiqamətində səyləri davam etdirmək niyyətindədir. İki tərəflə danışıqlar aparmaq imkanı əldə edən Türkiyə prezidenti öz vasitəçiliyini təklif etməyə davam etmək niyyətindədir. Bununla bağlı bugünkü telefon danışıqları istisna olmayacaq", - mənbə bildirib.
Rusiya Xarici İşlər Nazirliyi artıq bəyan edib ki, Kiyev danışıqlara deyil, eskalasiyaya hazırdır. Bundan əvvəl Kreml qeyd edib ki, Rusiya Qərbin ədalətli və uzunmüddətli sülhün vəziyyətin nizamlanmasının nəticəsi olması ilə bağlı bəyanatları ilə razıdır, lakin eyni zamanda, Moskva nizamlanma üzrə danışıqların perspektivini hələlik görmür.