BAKI, 19 dekabr — Sputnik. Ermənistan və Azərbaycan probleminin həllində Kollektiv Təhlükəsizlik Müqaviləsi Təşkilatı (KTMT) üçün siyasi və diplomatik tədbirlər prioritetdir. Bunu KTMT-nin baş katibi Stanislav Zas təşkilatın işində ilin yekunlarına həsr olunmuş tədbirdə çıxışı zamanı deyib.
Baş katib bildirib ki, indiki şəraitdə KTMT-nin əsas məqsədi dövlət təşkilatlarının təhlükəsizliyini təmin etməkdir.
O, Ermənistan və Azərbaycan arasındakı münasibətlər mövzusuna toxunaraq bildirib ki, siyasi və diplomatik tədbirlər, yaranan çağırış və təhdidlərə fəal reaksiya hələ də prioritet olaraq qalır.
KTMT-nin baş katibi bildirib ki, təşkilat Ermənistandan üz döndərmək fikrində deyil.
O qeyd edib ki, 2022-ci ildə təşkilata üzv dövlətlərin başçıları Ermənistan-Azərbaycan sərhədindəki vəziyyəti müzakirə etmək üçün üç dəfə görüşüblər.
Zas vurğulayıb ki, KTMT-nin Ermənistana müşahidə missiyasının göndərilməsi ilə bağlı təklifləri qüvvədə qalır, bunu kifayət qədər tez təşkil etmək olar:
"Ermənistan dövlət başçıları tərəfindən təsdiqlənməsi təklif edilmiş bütün tədbirlər paketi və ya ayrı-ayrı bəndlər üzrə təklifləri qəbul edərsə, o cümlədən missiya ilə bağlı qərar qəbul etməyi zəruri hesab edərsə, bu, olduqca tez həyata keçirilə bilər".
Zas onu da vurğulayıb ki, KTMT qüvvələr kontingentini genişləndirməyi planlaşdırmır, təşkilatın mövcud potensialı istənilən təhlükənin qarşısını almaq üçün kifayətdir.