BAKI, 16 dekabr — Sputnik. Moskva və Ankara Türkiyənin Suriyadakı xüsusi əməliyyatı ilə bağlı əlaqələri saxlayır. Bunu Rusiya xarici işlər nazirinin müavini Mixail Boqdanov jurnalistlərə bildirib.
"Bizdə məlumat mübadiləsi və koordinasiya sistemi qurulub, əsasən ölkələrimizin hərbi idarələri vasitəsilə onlar daim əlaqədədirlər... Həm Ankarada, həm Moskvada, həm də ən əsası, yerində... Hər şeydə razılaşmırıq, ancaq türkiyəli tərəfdaşlarla sıx əlaqədə olmağımız bir həqiqətdir ", - deyə Boqdanov vurğulayıb.
Türkiyə noyabrın 20-dən etibarən Suriyanın şimalında qadağan olunmuş Kürdüstan Fəhlə Partiyasının (PKK) Suriya qanadına qarşı hava əməliyyatı keçirir. Kobani şəhərinə, eləcə də İraqın şimalına zərbələr endirildiyi barədə məlumat verilib.
Türkiyə Prezidenti Rəcəb Tayyib Ərdoğan əməliyyatı uğurlu adlandırıb və onun ardınca quru əməliyyatının da keçiriləcəyini istisna etməyib.
Suriyanın şimalında planlaşdırılan quru əməliyyatından danışan prezident jurnalistlərə deyib ki, "bu işin ünvanlarını və həyata keçirilmə vaxtını söyləmək olmaz".