BAKI, 18 noyabr — Sputnik. Amerikanın “Meta” şirkəti (Rusiyada ekstremist təşkilat kimi qadağan olunub) son bir il ərzində 20-dən çox işçi və podratçını istifadəçi hesablarını sındırmaqda və rüşvət almaqda ittiham edərək işdən çıxarıb və ya cərimələyib, Wall Street Journal mənbələrinə istinadən yazır.
“Meta ötən il ərzində istifadəçi hesablarını qeyri-qanuni şəkildə ələ keçirməkdə, bəzi hallarda isə rüşvət almaqda ittiham etdiyi iyirmidən çox işçi və podratçını işdən çıxarıb və ya intizam tənbehi edib”, - nəşr yazır.
Mənbələrin bildirdiyinə görə, bəzi podratçılar hesablarında problem olan istifadəçilərə kömək etmək üçün yaradılmış “Oops” mexanizminə giriş əldə ediblər. Bəzi hallarda işçilər hesablara giriş əldə etmək üçün üçüncü tərəf hakerlərindən rüşvət alıblar.
Qəzetin sitat gətirdiyi şirkəti təmsil edən Andy Stone qeyd edib ki, Meta "belə sxemlərdə iştirak edənlərə qarşı müvafiq tədbirlər görməyə davam edəcək".
Ötən il oktyabrın 28-də Facebook adının Meta olaraq dəyişdirildiyini elan edib. Onun yaradıcısı Mark Zukerberq bildirib ki, yeni brend insan ekranlardan imtina edəcək və virtual reallıqda mövcudluq effektini yaşayacaq metaverseyə yönəlib.