BAKI, 11 noyabr - Sputnik. Bu gün Azərbaycan Milli Konservatoriyasında Zəfər günü və Bayraq Günü münasibətilə İsrailin "Sevgi" ansamblının konserti baş tutub.
Konserti çıxış sözü ilə açan Azərbaycan dağ yəhudiləri icmasının sədri Melix Yevdayev Azərbaycan və İsrail dövlətləri arasında dostluqdan bəhs edib:
"Biz yəhudiləri azərbaycanlılardan ayırmaq mümkün deyil. Biz bütün dövrlərdə birlikdə olduq. Bunun ən bariz nümunəsi İkinci Qarabağ savaşı oldu. Eyni zamanda, biz Birinci Qarabağ savaşında da birlikdə olduq. Biz sinaqoqda daima təvəqqe edirik ki, "dəmir yumruq" həmişə düşməni əzsin. Biz nəinki dostlaşdıq, qardaşlaşmışıq, biz pərçimlənmisik".
Daha sonra çıxış edən İsraildə yaşayan azərbaycanlı Salman Rabayev iki ölkə arasında olan mədəni əlaqələrdən söz açıb:
"Azərbaycan musiqisi ilə İsrail musiqisi çox oxşayır. Mən həmişə çalışmışam ki, Azərbaycan muğamlarını İsraildə təbliğ edim. Azərbaycan bizim doğma vətənimizdir. Mən çox istərdim ki, Türkiyə ilə olan münasibətlərimiz öz həllini tapsın. Üç ölkə həmişə bir addımlayaq".
Azərbaycan Milli Konservatoriyasında Zəfər günü və Bayraq bayramı münasibətilə İsrailin "Sevgi" ansamblının konserti
© Sputnik / Shahperi Abbasova
Tədbirdə mədəniyyət, dövlət və hökumət nümayəndələri ilə yanaşı, Birinci və İkinci Qarabağ savaşında vuruşmuş qazilər də iştirak edib. Konsertdə İsrail və Azərbaycan musiqiləri ifa olunub.