BAKI, 7 noyabr - Sputnik. Rusiya Ermənistan və Azərbaycanı iki ölkə arasında sabitliyi poza biləcək addımlardan çəkinməyə çağırır. Bunu jurnalistlərlə söhbətində Rusiya Federasiyası Prezidentinin mətbuat katibi Dmitri Peskov deyib.
“Biz hər iki ölkəni gərginliyin artmasına səbəb ola biləcək hər hansı hərəkət və addımlardan çəkinməyə çağırırıq”, - deyə Peskov Ermənistan və Azərbaycan arasında atışmanın yenidən başlaması ilə bağlı xəbərlərə Kremlin reaksiyasına dair sualı cavablandırıb.
Xatırladaq ki, Ermənistan Azərbaycanla sərhəddə yenidən təxribata əl atıb. Müdafiə Nazirliyindən verilən məlumata görə, noyabrın 6-sı saat 19:35-dən 21:50-dək fasilələrlə Ermənistan silahlı qüvvələrinin bölmələri Basarkeçər rayonunun Yuxarı Şorca istiqamətindəki mövqelərindən Ordumuzun Kəlbəcər rayonunun Mollabayramlı və Bəzirxana yaşayış məntəqələri istiqamətlərində yerləşən mövqelərini müxtəlif çaplı atıcı silahlardan atəşə tutub.
Azərbaycan Ordusunun bölmələri tərəfindən adekvat cavab tədbirləri görülüb.