BAKI, 31 oktyabr - Sputnik. İran İslam İnqilabı Keşikçiləri Korpusu (“Sepah”) Almaniya və Avropa İttifaqının (Aİ) terror təşkilatları siyahısına salına bilər.
“Iran International”ın yazdığına görə, bu barədə Almaniyanın xarici işlər naziri Analena Berbok danışıb.
O bildirib ki, Almaniya və Aİ bu məsələni nəzərdən keçirir.
XİN başçısı Birgə Hərtərəfli Fəaliyyət Planının (İran və bir qrup dövlət arasında İranın nüvə proqramı ilə bağlı 5+1 kimi tanınan siyasi razılaşma) bərpası üzrə danışıqların getmədiyini də vurğulayıb (Report).
Qeyd edək ki, İslam İnqilabı Keşikçiləri Korpusu (İİKK) 1979-cu ildə İran şiələrinin lideri, ali ayətullah Xomeyninin tərəfdarları olan İslam İnqilabı Komitələrinin hərbiləşdirilmiş dəstələrindən yaradılmış elit hərbi-siyasi birləşmədir. O, İran-İraq müharibəsində, həmçinin “Hizbullah” təşkilatının yaradılmasında fəal iştirak edib. Rəsmi olaraq İran silahlı qüvvələrinin bir hissəsidir.
ABŞ, İsrail, Səudiyyə Ərəbistanı və Bəhreyn hakimiyyət orqanları İİKK-nı terror təşkilatı kimi tanıyır.