BAKI, 27 oktyabr - Sputnik. Rusiya prezidenti Vladimir Putin deyib ki, uzun illər Rusiya Ermənistana azərbaycanlıların qovulduğu 5 rayonunu Bakıya qaytarmaqla Qarabağ məsələsini həll etməyi təklif edib, lakin İrəvan öz yolu ilə gedib.
“Biz uzun illər ərzində Ermənistan tərəfi ilə dialoq apardıq və Qarabağ məsələsinin nizamlanması ilə bağlı təklif etdik ki, gəlin münasibətlərin normallaşması ilə bağlı hərəkət edək".
Bu sözləri Rusiya Prezidenti Vladimir Putin Valday Diskussiya klubunun bugünkü plenar iclasında deyib.
Putin qeyd edib ki, Rusiya Ermənistan üçün beş rayonu Azərbaycana verib, iki rayonu - Kəlbəcərlə Laçını Qarabağla əlaqə üçün saxlamağı təklif edib:
“Axı Ermənistan faktiki olaraq Azərbyacanın yeddi rayonuna nəzarət edirdi. Təklif etdik ki, iki rayonu saxlasın. Hansısa mərhələdə Azərbaycan tərəfi ilə razılaşarıq. Beş rayonu verin. Onlar lazım deyildi. Saxlamaq mənasızdır. Onlar boş qalan rayonlardır, insanlar ordan gedib, faktiki olaraq həmin ərazilərdən qovulub. Onlar niyə saxlanılmalıdır? Bunun heç bir mənası yoxdur. Amma Qarabağla əlaqəsi olan iki rayon olduqca böyükdür".
Putin əlavə edib ki, azərbaycanlıların öz torpaqlarına qaytarılması ədalətli olardı:
"Bu, ümumilikdə regionda vəziyyətin normallaşması üçün yaxşı addım olardı. Lakin Ermənistan rəhbərliyi öz yolu ilə getdi. Məlum olduğu kimi, bu da bugunki vəziyyətə gətirib çıxardı”.
Sülh müqaviləsi məsələsi
"Moskvanın mövqeyi ondan ibarətdir ki, Bakı ilə İrəvan arasında sülh müqaviləsi lazımdır", - Putin deyib.
"Bizim mövqeyimiz ondan ibarətdir ki, bu sülh müqaviləsi, əlbəttə ki, lazımdır. Biz sülh yolu ilə nizamlanmanın, sərhədin delimitasiyası və sərhəd məsələsinin tam həllinin tərəfdarıyıq", - Rusiya prezidenti izah edib.
Onun sözlərinə görə, Rusiya heç kimə nəyisə məcbur etmək fikrində deyil, lakin hesab edir ki, gələcək sülh müqaviləsində bütün tərəflərin maraqlarına riayət edilməlidir.