BAKI, 22 oktyabr - Sputnik. Azərbaycanda uzunömürlü ailələrin sayı çoxdur. Nümunə olmaq üçün belə ailələri təbliğ etmək lazımdır. Çünki biz nə qədər uğurlu ailə modellərini təbliğ etsək, bir o qədər də ailələrimizin möhkəmliyinə, uzunömürlülüyünə xidmət etmiş olarıq. Bu səbəbdən də media, televiziyalar vasitəsilə davamlı olaraq bu cür ailələri təbliğ etməliyik.
Bunu Sputnik Azərbaycan-açıqlamasında gender məsələləri üzrə ekspert, Milli Məclisin Ailə, qadın və uşaq məsələləri komitəsinin məsləhətçisi Aynur Veysəlova deyib.
O fikrini əsaslandıraraq maraqlı bir nümunə çəkir: “Avropada belə bir eksperiment aparmışdılar ki, 3 ay müddətində heç bir media orqanı cinayət xəbərləri vermirdi. Əldə olunan nəticə də müsbət oldu, cinayət, ailə-məişət zorakılıqları azaldı. Bu vəziyyət boşanmaların da sayına müsbət təsir etdi”.
“Yəni, bu o deməkdir ki, biz nə qədər yaxşı xəbərlər yazıq, daha müsbət, pozitiv hadisələr görəcəyik. Bu istiqamətdə maarifləndirmə işlərini daha da genişləndirməliyik”, - deyə həmsöhbətimiz əlavə edib.
Həmsöhbətimiz bildirir ki, ailə institutunu möhkəmləndirmək üçün öncə hədəflər müəyyənləşdirilməlidir.