BAKI, 11 oktyabr — Sputnik. MDB-yə üzv dövlətlərin Xarici İşlər Nazirləri Şurasının oktyabrın 12-də Qazaxıstanın paytaxtı Astanada keçiriləcək iclasında aktual beynəlxalq və regional məsələlər müzakirə olunacaq.
Bunu Rusiya Xarici İşlər Nazirliyinin mətbuat katibi Mariya Zaxarova bildirib.
Onun sözlərinə görə, nazirlər toplantıda təşkilat çərçivəsində əməkdaşlığın inkişaf perspektivləri ətrafında fikir mübadiləsi aparacaq, 2023-cü il üçün MDB çərçivəsində nazirliklərarası çoxsəviyyəli məsləhətləşmələr planını təsdiqləyəcəklər.
XİN başçıları mədəni, humanitar, hüquq-mühafizə, insan hüquqları sahələrində əməkdaşlıqla bağlı bir sıra qərarlar qəbul edəcək, həmçinin MDB məkanında 2023-cü ilin "Rus dili ili" elan olunması ilə bağlı tədbirlər planı hazırlayacaqlar.
M.Zaxarova söyləyib ki, iclas zamanı MDB məkanında, onun xarici sərhədlərində təhlükəsizlik məsələlərinə xüsusi diqqət yetiriləcək. Mətbuat katibinin sözlərinə görə, Rusiyanın xarici işlər naziri Sergey Lavrov həmkarlarını ölkəsinin Ukraynada keçirdiyi xüsusi əməliyyatın gedişi, "DXR", "LXR", Xerson və Zaporojye vilayətlərində keçirilən "referendumun" nəticələri barədə məlumatlandıracaq.