BAKI, 7 oktyabr — Sputnik. Astarada torpaq sürüşməsi olub. Bu barədə Fövqəladə Hallar Nazirliyinin (FHN) Mətbuat Xidmətindən məlumat verilib.
Bildirilib ki, FHN-ə rayonun Sım kəndində baş vermiş torpaq sürüşməsi nəticəsində kənd sakini Xalıqov Xətai Xanoğlan oğluna məxsus evin yaşayış üçün təhlükəli vəziyyətə düşməsi barədə məlumat daxil olub.
Bununla əlaqədar FHN-in Cənub Regional Mərkəzinin əməkdaşları tərəfindən Sım kənd sakini Xalıqov Xətai Xanoğlan oğlu üçün müvəqqəti yaşayış məqsədilə çadır ev qurularaq vətəndaşa təhvil verilib.
Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin rəisi Əli Əliyev bu ilin martında açıqlamışdı ki, mütəmadi monitorinq nəticələrinə görə, hazırda ölkə ərazisində lokal və geniş sürüşməyə meyilli sahələrdə ciddi dinamik dəyişiklik müşahidə edilməyib: "Son məlumatlara görə, yalnız cənub bölgəsində və Abşeron yarımadasındakı Nübar massivində zəif dinamik aktivlik müşahidə olunur.
Cənub bölgəsində, əsasən Lerik və Astara rayonlarında, eyni zamanda, Lənkəran-Biləsər yolunun sol çiynində zəif sürüşmə elementləri müşahidə edilib. Lerik rayonunun iki kəndində uzunluqları 150 və 200 m olan daha çox çökmə-sürüşmə xarakterli proseslər baş verib.
Lakin son zamanlar bütün ölkə ərazisində intensiv atmosfer çöküntülərinin yağması, iqlim normasındam artıq olan qar və yağış çöküntülərinin həcminin artması müşahidə olunur. Bundan sonrakı mərhələdə, yəni atmosfer çöküntülərinin, qarın intensiv əriməsi nəticəsində sürüşmə prosesləri aktivləşə bilər".