BAKI, 16 sentyabr — Sputnik. Ermənistan ordusunun 135 hərbçisi ölüb. "Sputnik Armenia"nın məlumatına görə, bu barədə Ermənistan baş naziri Nikol Paşinyan deyib.
Paşinyan bildirib ki, ölkənin Təhlükəsizlik Şurası respublikada hərbi vəziyyətin tətbiqi imkanını müzakirə edib, lakin hələlik bu qərardan imtina etmək qərarına gəlib.
TASS xəbər verir ki, bu barədə o, Nazirlər Kabinetinin iclasında bildirib. "Biz Təhlükəsizlik Şurasında ölkədə hərbi vəziyyətin tətbiqi imkanını müzakirə etdik, qərara gəldik ki, hələlik buna ehtiyac yoxdur. Sərhədlərimizin müdafiəsində iştirak etmək istəyən vətəndaşlar var, onlar hərbi komissarlıqlara gedə bilərlər".
Qeyd edək ki, bundan əvvəl Ermənistanın baş naziri Nikol Paşinyan ölkə parlamentində çıxışı zamanı bildirmişdi ki, Azərbaycan-Ermənistan sərhədində toqquşmalar nəticəsində ölən erməni hərbçilərin təsdiqlənmiş sayı 49 nəfərdir. Sentyabrın 14-də Ermənistan parlamentində çıxışı zamanı baş nazir Ermənistan-Azərbaycan sərhədində eskalasiya zamanı erməni tərəfinin 105 hərbi qulluqçusunun həlak olduğunu dilə gətirib. Beləcə Ermənistan ordusunun canlı qüvvəsinin itki sayı 135-ə çatıb.
Sentyabrın 12-də gecə saatlarında Ermənistan silahlı qüvvələrinin bölmələri Azərbaycan-Ermənistan dövlət sərhədinin Daşkəsən, Kəlbəcər və Laçın istiqamətlərində genişmiqyaslı təxribat törədib.
Ermənistan silahlı qüvvələrinin diversiya qrupları sutkanın qaranlıq vaxtında ərazinin dağlıq relyefi və mövcud dərə boşluqlarını istifadə edərək müxtəlif istiqamətlərdə Azərbaycan Ordusunun bölmələrinin mövqeləri arasındakı ərazilərin və təminat yollarının minalanmasını həyata keçirib.
Bu əməllərin qarşısının dərhal alınması məqsədilə bölmələrimiz tərəfindən görülən təxirəsalınmaz tədbirlər nəticəsində döyüş toqquşması baş verib.
Ermənistan silahlı qüvvələrinin Basarkeçər, İstisu, Qarakilsə və Gorus yaşayış məntəqələri istiqamətində yerləşən bölmələri tərəfindən Azərbaycan Ordusunun Daşkəsən, Kəlbəcər və Laçın rayonları ərazisindəki bəzi mövqeləri, sığınacaqlar və dayaq məntəqələri müxtəlif çaplı silahlar, o cümlədən minaatanlardan intensiv atəşə tutulub. Nəticədə şəxsi heyət arasında itkilər var, hərbi infrastruktura ziyan dəyib.
Genişmiqyaslı təxribatın qarşısı alınarkən Azərbaycan Ordusununn 71 hərbi qulluqçusu şəhid olub.