BAKI, 9 sentyabr — Sputnik. ABŞ və digər G7 ölkələrinin tətbiq etməyi planlaşdırdığı Rusiya nefti üçün qiymət limiti risk həddi çıxılmaqla bazara uyğun olaraq müəyyən edilməlidir. Bu barədə ABŞ Maliyyə Nazirliyinin nümayəndəsi Elizabet Rozenberq bildirib.
"Qiymət həddi tarixi qiymət səviyyəsinə uyğun olmalıdır və ya o aralıqda saxlanmalıdır", - deyə Rozenberq qeyd edib.
Onun sözlərinə görə, qiymət həddi onun hasilatının maya dəyərini üstələyəcək və Rusiyada neftin istehsalının marjinal maya dəyərini nəzərə alacaq səviyyədə müəyyən ediləcək.
Siyasətçi həmçinin qeyd edib ki, G7 ölkələri yaxın bir neçə həftə ərzində yeni rejimin prinsipinin təfərrüatlarını işləyəcəklər.
Bundan əvvəl Dövlət Dumasının spikeri Vyaçeslav Volodin bildirmişdi ki, Rusiya neft və qazına qiymət limiti tətbiq etmək qərarına gəlməklə, G7 dövlətləri Rusiyaya qarşı tətbiq edilən sanksiyaların səmərəsizliyini qəbul edirlər.
Onu da xatırladaq ki, Qərb ölkələri Ukraynadakı vəziyyətlə əlaqədar Rusiyaya qarşı bir neçə dəfə sanksiya paketləri tətbiq ediblər. Rusiya Prezidenti Vladimir Putin bildirib ki, Rusiyanı cilovlamaq və zəiflətmək siyasəti Qərbin uzunmüddətli strategiyasıdır və sanksiyalar bütün qlobal iqtisadiyyata ciddi zərbə vurub.
Onun sözlərinə görə, Qərbin əsas məqsədi milyonlarla insanın həyatını pisləşdirməkdir. O əlavə edib ki, cari hadisələr Qərbin həm siyasətdə, həm də iqtisadiyyatda qlobal hökmranlığının altından xətt çəkir.
RF Prezidentinin sözlərinə görə, Rusiya təcrid olunmaq niyyətində deyil, onu müasir dünyada sərt şəkildə təcrid etmək olmaz.