BAKI, 31 avqust — Sputnik. Türkiyənin Krımla bağlı mövqeyi Moskva və Ankaranın qarşılıqlı əlaqələrinə mane olmur. Rusiya mediası xəbər verir ki, bunu Rusiya liderinin mətbuat katibi Dmitri Peskov deyib.
O bildirib ki, Rusiya Türkiyənin çətin vəziyyətləri həll etmək səylərini yüksək qiymətləndirir.
Kremlin rəsmi nümayəndəsi xatırladıb ki, Türkiyə əvvəldən də bu məsələdə Rusiya ilə fikir ayrılığını bəyan edib.
“Ancaq Krım Rusiyanın bir hissəsidir. Ərdoğanın dedikləri isə qeyri-mümkündür”, - deyə Rusiya liderinin mətbuat katibi Türkiyə Prezidenti Rəcəb Tayyib Ərdoğanın Krımın Ukraynaya qaytarılması ilə bağlı verdiyi açıqlamaya münasibət bildirərkən bildirib.
“Bu, bizim üçün əlverişli olan məqamda Türkiyə ilə qarşılıqlı əlaqəyə mane olmur. Biz Türkiyənin taxılla bağlı məsələdə olduğu kimi çətin vəziyyətləri aradan qaldırmaq üçün göstərdiyi səyləri yüksək qiymətləndiririk. Bizim üçün faydalı olan yerdə ünsiyyət qurmuşuq və gələcəkdə də quracayıq”, - deyə Peskov əlavə edib.
Rusiya Prezidentinin sözçüsü onu da qeyd edib ki, Ankara və Moskva “qarşılıqlı əlaqələri dərinləşdirmək üçün çox yaxşı potensiala malikdir”.