BAKI, 29 avqust — Sputnik. Rusiya Federal Təhlükəsizlik Xidməti (FTX) Natalya Vovk ilə birlikdə jurnalist Darya Duqinanın qətlini hazırlayan təxribat-terrorçu qruplaşmanın daha bir üzvünü müəyyən edib. Bu açıqlama ilə FTX-nin İctimaiyyətlə Əlaqələr Mərkəzi çıxış edib. Bildirilib ki, şübhəli cinayətdən bir gün əvvəl Rusiyanı tərk edib.
"Növbəti tədbirlər zamanı müəyyən edilib ki, Darya Duqinanın qətlini Nataliya Vovk ilə birlikdə Moskvada Ukrayna təxribat-terror qruplaşmasının digər üzvü, Ukrayna vətəndaşı, 1978-ci il təvəllüdlü Boqdan Petroviç Tsqanenko hazırlayıb", - qurumun açıqlamasında deyilir.
Ukrayna vətəndaşının bu il iyulun sonunda Estoniya ərazisindən tranzitlə Rusiyaya gəldiyi və qətldən bir gün əvvəl ölkəni tərk etdiyi bildirilir. Açıqlamada bildirilir ki, bu şəxs Vovka avtomobil nömrələrini, eləcə də Qazaxıstan vətəndaşı Yuliya Zaikonun adına sənədləri verib. Bundan əlavə, o, əldəqayırma partlayıcı qurğunun yığılmasına kömək edib.
Daha əvvəl FTX Darya Duqinanın qətlinin Ukrayna xüsusi xidmət orqanlarının sifarişi ilə Natalya Vovk tərəfindən törədilməsinə dair sübutların olduğunu, sonra onun Estoniyaya qaçdığını açıqlamışdı. Xatırladaq ki, qətl avqustun 20-də axşam saatlarında törədilib. Qatillər avtomobilə partlayıcı qurğu yerləşdiriblər.