BAKI, 15 avqust — Sputnik. "Energiya" Raket və Kosmik Korporasiya" (Roskosmosun bir hissəsi) ilk dəfə olaraq "Ordu-2022" forumunda Rusiyanın perspektivli orbital stansiyasının maketini nümayiş etdirib. Bu barədə TASS xəbər verir.
Maketdə ikinci mərhələnin stansiyası təqdim olunur. Bu, orbitdə təkcə bazanın olmasını deyil, enerji, qovşaq və şlüz modullarının, həmçinin istehsal modullarının, eləcə də xidmət platformasının olmasını nəzərdə tutur. Maketdə "Orel" adlı gəmi də nümayiş olunur.
İyulda "Roskosmos"un rəhbəri Yuri Borisov Rusiya Prezidenti Vladimir Putinlə görüşdə Rusiyanın 2024-cü ildən sonra BKS layihəsindən çıxarılması barədə qərarın verildiyini, eyni zamanda tərəfdaşlar qarşısında bütün öhdəliklərin yerinə yetiriləcəyini bildirmişdi. O qeyd edib ki, Rusiya Federasiyası BKS layihəsindən çəkilənədək Rusiya Orbital Stansiyasının (ROS) formalaşması başlayacaq.
"Ordu-2022" forumu rəsmi olaraq avqustun 15-də açılıb və avqustun 21-dək davam edəcək. Forum çərçivəsində Rusiyanın 30-dan çox regionunda Patriot Parkının obyektlərində, Alabino poliqonunda, Kubinka aerodromunda, eləcə də bütün hərbi dairələrdə və Şimal Donanmasında 289 tədbirin keçirilməsi planlaşdırılır. Forumda 72 ölkədən hərbi nümayəndə heyətləri iştirak edəcəklər.