BAKI, 30 iyul - Sputnik. Türkiyə Azərbaycana daha 13 minatəmizləyən maşın verib. Bu barədə Türkiyənin Milli Müdafiə Nazirliyi məlumat yayıb.
“Qarabağda minalı ərazilərin təmizlənməsində istifadə olunacaq "MEMATT"lar (Mexaniki Mina Təmizləmə Təchizatı) qardaş Azərbaycan üçün xeyirli olsun. Ümumilikdə, qardaş Azərbaycana 20 "MEMATT" verilib”, - nazirlikdən bildirilib.
Xatırladaq ki, Böyük Britaniya da işğaldan azad olunan ərazilərin minalardan təmizlənməsi fəaliyyətini dəstəkləmək üçün Azərbaycana 500.000 funt sterlinq ayırıb.
Bu barədə Böyük Britaniyanın Azərbaycandakı səfirliyi iyunun sonlarında məlumat yayıb.
"Böyük Britaniya regionu insanlar üçün təhlükəsiz yerə çevirmək və regionda sabitlik üçün çalışır. Böyük Britaniya bölgədə minatəmizləmə fəaliyyətini dəstəkləmək üçün əlavə 500.000 funt sterlinq ayırıb", - məlumatda deyilir.
Böyük Britaniyanın Azərbaycandakı səfiri Ceyms Şarp da bununla bağlı özünün "Twitter" səhifəsində paylaşım edib.
Paylaşımda deyilir: "Biz bir yerdə regionda sülh üçün çalışmağa davam edirik. Britaniya Xarici İşlər Nazirliyi regionda minatəmizləmə fəaliyyəti üçün əlavə £500,000 ayrıldığını elan etdi. İnanıram ki, bu vəsait Azərbaycan Respublikasının Minatəmizləmə Agentliyinə (ANAMA) mülki əhali arasında riskləri azaltmağa və insanlara öz həyatlarını yenidən qurmağa imkan verəcək".