BAKI, 23 iyul-Sputnik, Xalid Məmmədov. Azərbaycan BMT-nin dəstəyi ilə Ukrayna, Türkiyə və Rusiya arasında taxıl ixracına dair sazişləri alqışlayır.
Bu barədə Azərbaycan Xarici İşlər Nazirliyinin tviter səhifəsində məlumat verilib.
“Biz taxıl ixracı sazişinin imzalanmasını və Türkiyə ilə BMT-nin uğurlu vasitəçilik səylərini alqışlayırıq. Bu, qlobal ərzaq təhlükəsizliyinə mühüm töhfədir. Biz sazişin tezliklə həyata keçirilməsini səbirsizliklə gözləyirik”, - paylaşımda deyilir.
Qeyd edək ki, iyulun 22-də İstanbulda Ukrayna, Türkiyə və Rusiya BMT-nin Baş katibi Antonio Quterreşin dəstəyi ilə Odessa, Çernomorsk və Pivdennıy dəniz limanlarından taxılın, əlaqədar ərzaq məhsullarının və gübrələrin (ammonyak da daxil olmaqla) ixracı üçün təhlükəsiz daşımaların təşviqi barədə razılığa gəliblər. Sazişə əsasən, razılaşma sonradan uzadılma ehtimalı ilə 120 gün üçün nəzərdə tutulub.
“Önümüzdəki günlərdə başlayacaq daşınma ilə Qara dənizdən dünyanın bir çox ölkəsinə yeni nəfəs gələcək. Gəmilərin yola salınmasından tutmuş təhlükəsiz köçürülməsinə və təyinat limanına çatmasına qədər bütün proseslər üzrə razılıq əldə edilib. İstanbulda Rusiya və Ukrayna tərəfləri ilə atdığımız bu birgə addımın sülh ümidlərini canlandıracaq yeni dönüş nöqtəsi olmasını arzu edirəm”, - deyə Türkiyə Prezidenti imzalanma mərasimində qeyd edib.