BAKI, 17 iyul - Sputnik. Serbiya və Xorvatiya arasında kiçik diplomatik böhran yaşanıb. Azərtac xəbər verir ki, Xorvatiya İkinci Dünya müharibəsi illərində ölkənin ən böyük həbs düşərgəsi olan Yasenovaça səfər etməyi planlaşdıran Serbiya Prezidenti Aleksandr Vuçiçin ölkəyə girişini qadağan edib.
Serbiya Prezidenti Xorvatiya hakimiyyətinə əvvəlcədən məlumat vermədən Yasenovaç və Pokraça səfər etmək istəyib, lakin xorvat rəsmilər bu səfərin baş tutmasına icazə verməyiblər.
Xorvatiya rəsmiləri diplomatik münasibətlər protokollarını pozan Aleksandr Vuçiçin məqsədinin təxribat olduğunu iddia ediblər.
Serbiyanın daxili işlər naziri Aleksandar Vulin isə ölkəsinin xorvat rəsmilərinə qarşı sərhəd siyasətini dəyişəcəyini, xidməti və diplomatik pasport sahibi olan Xorvatiya vətəndaşlarının bundan sonra Serbiyaya daxil olarkən səfərin səbəbini açıqlamalı olacaqlarını deyib.