BAKI, 13 iyul - Sputnik. Rusiya Müdafiə Nazirliyinin nümayəndələri Ukraynadan kənd təsərrüfatı məhsullarının çıxarılması ilə bağlı təkliflərini təqdim edib.
Bu barədə Rusiya Müdafiə Nazirliyinin rəsmisi İqor Konaşenkov açıqlama verib.
“İstanbulda Rusiya Müdafiə Nazirliyinin nümayəndələri Ukrayna, Türkiyə və BMT nümayəndələrinin iştirakı ilə keçirilən dördtərəfli görüşdə Qara dəniz limanlarından taxılın çıxarılmasının təşkili ilə bağlı öz təkliflərini verib. Rusiya nümayəndə heyəti tərəfindən bu məsələnin praktik həlli ilə bağlı təkliflər paketi təqdim olunub”, - o deyib.
Xatırladaq ki, hazırda İstanbulda Türkiyə, Rusiya Federasiyası və Ukrayna Müdafiə Nazirliklərinin hərbi heyətləri ilə Birləşmiş Millətlər Təşkilatının nümayəndə heyətləri arasında taxıl dəhlizinə dair danışıqlar başlayıb. Görüş Kalender Qəsrində keçirilir.
Heyətlər Ukrayna limanlarında gözləyən taxılın dəniz yolu ilə beynəlxalq bazarlara təhlükəsiz daşınmasını müzakirə edirlər.