BAKI, 25 may — Sputnik. Mayın 25-də Milli Məclisin İqtisadi siyasət, sənaye və sahibkarlıq komıtəsinin iclası keçirilir.
İclasda 2021-ci il üçün dövlət büdcəsinin icrası müzakirə edilir.
Maliyyə naziri Samir Şərifov bildirib ki, 2021-ci il sosial-iqtisadi baxımdan uğurlu il olub. Pandemiyaya qarşı geniş vaksinasiyanın həyata keçirilməsi və məhdudiyyətlərin tədricən aradan qaldırılması məqsədyönlü tədbirlərin həyata keçirilməsi nəticəsində baş verib. Dünya bazarında neft qiymətlərinin artması iqtisadiyyatın gözləniləndən daha tez bərpa olunmasına şərait yaradıb.
Azərbaycan iqtisadiyyatına xarici mənfi təsirlər olub
O bildirib ki, ötən il Azərbaycan iqtisadiyyatı sabit inkişaf etsə də iqtisadiyyatımıza xarici mənfi təsirlər də var idi və burada söhbət inflyasiyanın artmasından gedir. İflyasiyanın artmasının səbəblərindən biri də ərzaq məhsullarının dünya miqyasında bahalaşması olub. Dövlət tərəfindən həmin proseslər nəzərə alınaraq müxtəlif subsidiya proqramlarının həyata keçirilməsinə qərar verilib.
Nazir bildirib ki, ötən il işğaldan azad edilmiş şəhərlərimizin baş planlarının hazırlanması üçün 25 milyon manat vəsait ayrılıb. 2021-ci ilin dövlət büdcəsində işğaldan azad olunmuş ərazilərin yenidən qurulması və bərpası üzrə ümumilikdə 2,2 milyard manat nəzərdə tutulub. Müvafiq istiqamət üzrə ilin sonuna icra edilmiş məbləğ 2,178 milyard manat olub ki, bu da təsdiq edilmiş göstəricinin 99 %-nə bərabərdir.
İpoteka kreditlərinə ayrılan vəsait artırılır
O qeyd edib ki, Azərbaycanda ipoteka kreditlərinə yüksək tələbat müşahidə olunmaqdadır. Hər il dövlət büdcəsində bu istiqamətdə ayrılan vəsait artırılır. Ötən ilin dövlət büdcəsindən ipoteka kreditləri üçün 80 milyon manatdan artıq vəsait ayrılıb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.