Azərbaycanda bir ölkə sakini ayda nə qədər pul xərcləyib?

BAKI, 24 may — Sputnik. Azərbaycanda adambaşına düşən orta aylıq xərc artıb. Bu ilin 4 ayında pərakəndə ticarətdə bir ölkə sakini hər ay orta hesabla 346,7 manat pul xərcləyib. Bu, ötən ilin müvafiq dövrü ilə müqayisədə 46,3 manat çoxdur. Xərclərin 197,8 manatı ərzaq, içki və siqaretin, 148,9 manatı isə qeyri-ərzaq mallarının payına düşüb.

İqtisadçı Xalid Kərimli Sputnik Azərbaycan-a açıqlamasında bildirib ki, xərclərin artmasının əsas səbəbi məhz inflyasiyadır. Pərakəndə ticarətdə əsas yeri ərzaq məhsulları tutur. Ölkədə ərzaq inflyasiyası 18 faizə yaxınlaşıb. Təkcə ərzağın qiyməti qalxmayıb, qeyri-ərzaq mallarının (6 faizdən çox), ödənişli xidmətlərin (10 faizdən çox) qiymətləri də bahalaşıb.

O vurğulayıb ki, xərclərin artmasının əsas səbəbi qiymətlərin bahalaşmasıdır. Manatın alıcılıq qabiliyyətinin aşağı düşməsi səbəbindən əhali eyni məhsula daha çox pul xərcləyir.

Qeyd edək ki, ötən ilin 4 ayında ticarət şəbəkəsində bir ölkə sakini orta hesabla ayda 300,4 manat pul xərcləyib. Bunun 165 manatı ərzaq, içki və tütün məmulatlarına, 135,4 manatı isə qeyri-ərzaq mallarının alınmasına gedib.

Xatırladaq ki, bu ilin yanvar-aprel aylarında pərakəndə ticarətdə istehlakçılara 13,9 milyard manatlıq mallar satılıb. Bunun 7,9 milyard manatı ərzaq məhsulları, içki və tütün məmulatlarının, 6 milyard manatı isə qeyri-ərzaq mallarının payına düşüb. Ötən ilin eyni dövrü ilə müqayisədə pərakəndə ticarət dövriyyəsi 3 faiz artıb.

Alıcıların xərclədiyi vəsaitin 51,5 faizi ərzaq məhsullarının, 5,6 faizi içki və tütün məmulatlarının, 13,3 faizi toxuculuq məhsulları, geyim və ayaqqabıların alınmasına sərf olunub.

Xərclənən vəsaitin 5,9 faizi avtomobil benzini və dizel yanacağının, 4,6 faizi elektrik malları və mebellərin, 2,4 faizi əczaçılıq məhsulları və tibbi ləvazimatların, 1,2 faizi kompüterlər, telekommunikasiya avadanlıqları və çap məhsullarının payına düşüb.