BAKI, 19 may — Sputnik. Bakının mərkəzində aktyor Pərviz Fəxrəddinə qarşı zorakılıq edilib. Bir neçə aydır Xəqani küçəsində pantomim nömrələri ilə çıxış edən, bununla da hər kəsin diqqətini çəkən Pərviz Fəxrəddin Bakı sakini tərəfindən şiddətə məruz qalıb. Bu barədə açıqlama verən aktyor bildirir ki, performans göstərən zaman həmin şəxs yaxınlaşıb və aktyora şillə vurub: "Haradasa 55-60 yaşlarında bir insan mənə yaxınlaşdı. Şillə vurub getdi. Yaşlı insan idi və mən də öz işimin başında idim. Ona görə də heç nə etmədim. Həmin şəxs hazırda axtarışdadır. Onun kimliyi və psixoloji vəziyyəti ilə bağlı heç bir məlumat yoxdur".
Həmin an ortayaşlı vətəndaşa aktyorun xanım tanışı müdaxilə edib.
Məlumat üçün bildirək ki, Pərviz Fəxrəddin küçə incəsənəti ilə məşğuldur. Onu ölkəmizdə bu işin "pioneri" adlandıra bilərik. Pərviz Azərbaycan Dövlət Mədəniyyət və İncəsənət Universitetinin Dram, teatr və kino aktyoru fakültəsini bitirib. Hazırda aktyor və ssenarist kimi fəaliyyət göstərir. Bundan öncə canlı heykəl kimi Türkiyədə çıxış edib. Daha sonra isə bu işi ölkəmizdə davam etdirməyi düşünüb.
Əvvəlcə müəyyən dövlət qurumlarına müraciət edib. Onun ideyasını bəyənərək dəstək olublar. Odur ki, indi Pərviz "canlı heykəl", yaxud "çamadanlı adam" kimi Bakı küçələrində performans nümayiş etdirir.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.