BAKI, 18 aprel — Sputnik. Rusiyada parlament komissiyası ABŞ-ın Ukraynadakı biolaboratoriyalarının fəaliyyətinin araşdırılması çərçivəsində sənədlərin hazırlanmasına, habelə şahidlərin dindirilməsinə başlayıb. Bu barədə komissiyanın həmsədri, Dövlət Dumasının vitse-spikeri İrina Yarovaya bildirib.
“Biz müntəzəm olaraq şahidlərin sorğusunu aparırıq və bu gün çox dəyərli məlumat əldə etmişik. Şübhəsiz ki, həmin məlumatlar sənədlərə əlavə olunacaq. Bu bizə ABŞ-ın Ukraynada bakterioloji silahların tədqiqatı üçün potensial olaraq uyğunlaşdırılmış bioloji laboratoriyalar yaratması və müvafiq təcrübələr aparması ilə bağlı əlaqələr zəncirini qurmağa imkan verir”, - deyə Dumanın mətbuat xidməti Yarovayanın sözlərini qeyd edir.
Məlumatda qeyd edildiyi kimi, işin ilk sənədləşdirilmiş nəticələri artıq sənədə əlavə edilib.
Rusiya parlamentinin hər iki palatasının Ukraynadakı ABŞ bioloji laboratoriyalarının fəaliyyətini araşdırması üzrə komissiyanın həmsədri İrina Yarovaya jurnalistlərə bildirib ki, Bioloji Laboratoriyalar üzrə Komissiya Ukraynada xəstəliyin yayılması ilə bağlı araşdırma aparacaq.
“Bu gün biz təkcə “LXR və DXR”də deyil, Ukrayna ərazisində də xəstəliyin yayılması ilə bağlı hər bir iş üzrə ayrıca araşdırma aparacağıq”, - deyə Yarovaya bildirib.
Onun sözlərinə görə, komissiya əmindir ki, Ukrayna vətəndaşları ABŞ Müdafiə Nazirliyinin yardımı ilə öz hakimiyyət orqanları tərəfindən hədəfə alınıblar.
O, həmçinin komissiyanın nəzdində elmi-məşvərət şurasının yaradılmasını və bu iclasın mayın 5-də keçiriləcəyini açıqlayıb.
Bundan əvvəl Dövlət Dumasının vitse-spikeri bildirib ki, komissiya “Rospotrebnadzor”dan vərəmin, qızılcanın Asiya ştammını təhlil etməyi və onları ABŞ laboratoriyalarının Ukraynadakı lokalizasiyası ilə əlaqələndirməyi xahiş edib. Bundan əlavə, komissiyanın nümayəndələri mətbuata məlumat veriblər ki, diplomatik kanallar vasitəsilə ABŞ dövlət katibinin siyasi məsələlər üzrə müavini Viktoriya Nulandın Rusiyaya dəvət edilməsi proseduruna başlanılıb.
Rusiya Radiasiya, Kimyəvi və Bioloji Müdafiə Silahlı Qüvvələrinin rəhbəri İqor Kirillov bu yaxınlarda bildirib ki, Ukrayna ərazisində Pentaqonun maraqları üçün fəaliyyət göstərən 30-dan çox bioloji laboratoriyalar şəbəkəsi formalaşdırılıb. Onun sözlərinə görə, ABŞ-ın hərbi bioloji proqramının davam etdirilməsi üçün hər şey Rusiyanın xüsusi hərbi əməliyyatına başladıqdan sonra Ukraynadan çıxarılıb.
Rusiya Xarici İşlər Nazirliyinin rəsmi nümayəndəsi Mariya Zaxarova bildirib ki, Rusiya ABŞ-ın Ukraynadakı hərbi bioloji fəaliyyəti faktları ilə əlaqədar olaraq “Bioloji və Zəhərli Silahların Qadağan edilməsi haqqında” Konvensiyasına uyğun olaraq məşvərət mexanizminin işə salınmasını istisna etmir.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.