BAKI, 7 aprel — Sputnik. Sosial şəbəkələrdə yol təmiri zamanı kənarda park edilmiş avtomobilin olduğu yerə asfalt vurulmayıb. Sputnik Azərbaycan-ın xəbərinə görə, həmin foto Bayıl qəsəbəsindən 20-ci sahəyə gedən yolda çəkilib.
Yol asfaltlanarkən Rusiya dövlət nömrə nişanlı avtomobilin park edildiyi hissə olduğu kimi qalıb. Bu isə sosial şəbəkələrdə gülüş hədəfinə çevrilib.
Avtomobil Yolları Dövlət Agentliyinin mətbuat xidmətinin rəhbəri Anar Nəcəfli Sputnik Azərbaycan-a açıqlamasında təmir zamanı həmin avtomobilin sahibinin tapılmadığı üçün belə bir hadisənin baş verdiyini bildirib:
"AAYDA əməkdaşlarının sahibi olmadan hər hansı nəqliyyat vasitəsinə toxunmağa, əl dəyməyə və onun yerini dəyişməyə ixtiyarı yoxdur. Asfalt da elədir ki, o gətiriləndə temperatur soyumamış döşənməlidir. Artıq bu gün həmin problem aradan qaldırılacaq".
Qeyd edək ki, sosial şəbəkələrdəki qınaqdan sonra yol asfaltlanıb.