BAKI, 15 mart — Sputnik. Azərbaycanda işçilərin distant, yəni evdən və ya oteldən işləməsi imkanı qanunvericiliyə daxil ediləcək. Bu Əmək və Əhalinin Sosial Müdafiəsi Nazirliyində Azərbaycanda Amerika Ticarət Palatası (“AmCham Azərbaycan”) üzvləri ilə görüşdə bildirilib.
Bu təkliflə bağlı bildirilib ki, artıq Əmək Məcəlləsində dəyişikliklər edilməsi haqqında yeni qanun layihəsi hazırlanıb. Burada «distant (məsafədən) iş», əmək funksiyalarının elektron, proqram-texniki, telekommunikasiya vasitələri əsasında işəgötürənin iş yerlərindən kənarda yerləşən, əmək funksiyalarının yerinə yetirilməsi üçün münasib olan digər yerdə, məsələn evdə, mehmanxanada və s. yerinə yetirilməsi forması nəzərdə tutulub.
Həmçinin əmək funksiyalarının distant (məsafədən) iş formasında yerinə yetirilməsi ilə əlaqədar əmək şəraitinin əlavə şərtlərinin tərəflərin qarşılıqlı razılığı ilə əmək müqaviləsində müəyyən edilməsi təklifi də layihədə əksini tapır.
Eləcə də distant iş ilə bağlı əmək münasibətlərində hüquqi tənzimləmələrin formalaşdırılması, işçilərin ezamiyyətə göndərilməsi qaydalarının təkmilləşdirilməsi və s. ilə bağlı Palatanın təkliflərinə dair müzakirələr aparılıb.
Sputnik Azərbaycan qanuna dəyişikliyin hansı zərurətdən irəli gəldiyini, eləcə də distant işin hansı əmək sahələrini əhatə edəcəyini araşdırıb.
Sputnik Azərbaycan-ın sorğusuna Əmək və Əhalinin Sosial Müdafiəsi Nazirliyindən verilən cavabda bildirilib ki, Əmək Məcəlləsinə dəyişiklik edilməsi ilə bağlı hazırlanmış yeni layihədə Məcəlləyə “distant (məsafədən) iş” anlayışının daxil edilməsi nəzərdə tutulub:
Məlumatda qeyd olunur ki, ölkə prezidentinin 2016-cı il 20 sentyabr tarixli 2345 nömrəli Sərəncamı ilə təsdiq edilmiş “Azərbaycan Respublikasında informasiya cəmiyyətinin inkişafına dair Milli Strategiyanın həyata keçirilməsi üzrə 2016-2020-ci illər üçün Dövlət Proqramı”nda nəzərdə tutulmuş Tədbirlər planının 5.4.3.5-ci bəndinin icrasını təmin etmək, işçilərin distant (məsafədən) iş və ya teleiş formasında əmək funksiyasının yerinə yetirilməsinin hüquqi əsasının yaradılmasını təmin etmək məqsədilə Əmək Məcəlləsinin müvafiq maddələri təkmilləşdirilir.
Layihə təkmilləşdirilərkən “distant (məsafədən) iş” anlayışında “teleiş” forması da nəzərə alınıb. Əmək funksiyalarının distant (məsafədən) iş formasında yerinə yetirilməsi ilə əlaqədar əmək şəraitinin əlavə şərtləri tərəflərin qarşılıqlı razılığı ilə əmək müqaviləsində müəyyən ediləcək.