BAKI, 1 mart - Sputnik. AMEA-nın müxbir üzvünün hazırladığı vaksin Ümumdünya Səhiyyə Təşkilatının siyahısına salınıb.
Bu barədə AMEA-dan Sputnik Azərbaycan-a daxil olan məlumatda deyilir.
Bu gün Azərbaycan Milli Elmlər Akademiyasının (AMEA) prezidenti v.i.e. akademik Arif Həşimov qurumun Biologiya və Tibb Elmləri Bölməsinin (BTEB) elmi müəssisə rəhbərləri ilə görüşüb.
Azərbaycanda biologiya, tibb və kənd təsərrüfatı elm sahələrinin inkişafının müasir problemləri üzrə molekulyar biologiya, molekulyar genetika, bioinformatika, sistemli biologiya və digər texnologiyaların həyat proseslərinə kompleks tətbiqi məsələlərinə toxunan A.Həşimov ölkəmizdə də bu istiqamətdə tədqiqatların aparıldığını diqqətə çatdırıb.
AMEA-nın vitse-prezidenti, bölmənin Elmi Şurasının sədri, akademik İradə Hüseynova artıq dünyada yaradılmış vaksinlərin müsbət nəticəsini verdiyini, eləcə də AMEA-nın müxbir üzvü Tərlan Məmmədov tərəfindən hazırlanan vaksinin Ümumdünya Səhiyyə Təşkilatının siyahısına salındığını deyib. O, bununla bağlı Akademiyada AMEA, Səhiyyə Nazirliyi, TƏBİB və Azərbaycan Tibb Universitetinin mütəxəssislərinin iştirakı ilə elmi seminarın keçirilməsinin planlaşdırıldığını söyləyib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.