Azərbaycanın rayon və şəhərlərində maaşlar nə qədər olub - CƏDVƏL

BAKI, 24 fevral — Sputnik. Ötən il Azərbaycanda muzdla çalışan işçilərin sayı 1 milyon 705,1 min nəfər olub. Ölkə üzrə muzdla çalışan işçilərin orta aylıq nominal əməkhaqqı 2020-ci ilə nisbətən 3,4 faiz artaraq 732,1 manat təşkil edib.

Bəs ötən il ölkədə rayon və şəhərlər üzrə orta aylıq əməkhaqqı nə qədər olub, ən yüksək və ən aşağı orta aylıq əməkhaqqı hansı rayon və şəhərlərdə qeydə alınıb?

Dövlət Statistika Komitəsinin məlumatına görə, ötən il ən yüksək orta aylıq nominal əməkhaqqı Bakı şəhərində qeydə alınıb. Belə ki, paytaxta bu göstərici 948,9 manat təşkil edib. İkinci ən çox orta aylıq nominal əməkhaqqı Daşkəsən rayonunda olub - 709,4 manat. Üçüncü yerdə isə 668,1 manat olmaqla Gədəbəy rayonu qərarlaşıb.

Ən yüksək orta aylıq nominal əməkhaqqının olduğu dördüncü yer 647,2 manat olmaqla Sumqayıt şəhəri, beşinci yer isə 626,7 manat olmaqla Sədərək rayonudur.

Ölkə üzrə ən aşağı orta aylıq nominal əməkhaqqı Qax rayonunda qeydə alınıb. Belə ki, rayonda bu göstərici 399,4 manat olub. İkinci ən aşağı orta aylıq nominal əməkhaqqı Zaqatala rayonunda qeydə alınıb - 411,1 manat. Üçüncü yerdə isə 413,6 manat olmaqla Ağdam rayonu qərarlaşıb.

Ən aşağı orta aylıq nominal əməkhaqqının olduğu dördüncü yer 417,1 manat olmaqla Balakən rayonu, beşinci yer isə 420,1 manat olmaqla Xızı rayonudur.

Bundan başqa, Qarabağ iqtisadi rayonu üzrə ötən il orta aylıq nominal əməkhaqqı 437,5 manat təşkil edib. Məsələn, Şuşada bu göstərici 545,1 manat, Füzulidə 467,7 manat, Tərtərdə 430,2 manat olub.

Şərqi Zəngəzur iqtisadi rayonu üzrə orta aylıq nominal əməkhaqqı 483,2 manat olub. Bu göstərici Şərqi Zəngəzur iqtisadi rayonuna daxil olan Cəbrayıl rayonunda 496,7 manat, Kəlbəcər rayonunda 463,2 manat, Qubadlı rayonunda 559,3 manat, Laçın rayonunda 456,6 manat, Zəngilan rayonunda 526,0 manat qeydə alınıb.

Qeyd edək ki, 2021-ci ilin ilkin məlumatlarına əsasən, ölkə iqtisadiyyatında muzdla çalışan işçilərin orta aylıq nominal əməkhaqqı 2020-ci ilə nisbətən 3,4 faiz artaraq 732,1 manat təşkil edib. Əməkhaqqı neft-qaz sektorunda 3163,8 manat, qeyri-neft-qaz sektorunda 683,6 manat təşkil edib. Dövlət müəssisələrində çalışan işçilərin əməkhaqları 652,7 manat, özəl müəssisələrdə isə 825,2 manat olub.

Dövlət Statistika Komitəsinin məlumatına görə, 2022-ci il fevralın 1-i vəziyyətinə iqtisadi fəal əhalinin sayı 5 milyon 304,3 min nəfər olub, onlardan 4 milyon 988,5 min nəfərini məşğul əhali təşkil edib.

Cari il yanvarın 1-i vəziyyətinə muzdla çalışan işçilərin sayı ilkin məlumatlara əsasən, 1 milyon 705,1 min nəfər, o cümlədən iqtisadiyyatın dövlət sektorunda 904,7 min nəfər, qeyri-dövlət sektorunda isə 800,4 min nəfər təşkil edib. İqtisadiyyatın neft-qaz sektorunda 31,5 min nəfər, qeyri-neft-qaz sektorunda isə 1 milyon 673,6 min nəfər çalışıb.